Nagsagawa ng pagsisiyasat ang isang grupo ng estudyante sa kanilang paaralan noong ika-22 ng Mayo, 2021 ukol sa pagpapa-rehistro ng mga senior high school student para sa eleksyon sa taong 2022.

​

Lumabas sa pagsusuri na anim sa sampung estudyante ang rehistrado na para sa halalan 2022.

​

Naitalang 61 porsyento (64 mag-aaral) ng mga tumugon sa sarbey ang rehistrado na; 22 porsyento (24 mag-aaral) ang magpaparehistro pa lamang; habang 17 porsyento (18 mag-aaral) naman ang hindi pa maaaring magpa-rehistro.

​

Base ito sa datos na nakalap mula sa 105 na tumugon na binubuo ng 31 na estudyanteng nasa ika-labindalawang baitang at 74 na mula sa ika-labing-isang baitang.

​

Ayon pa sa impormasyon, rehistrado na ang karamihan sa mga nasa ika-labindalawang baitang.

​

Sa kabila nito, ang mga nasa ika-labing-isang baitang ang bumubuo sa malaking bahagi ng hindi pa maaaring magpa-rehistro.

​

Tinatayang edad ang pangunahing dahilan ng mga hindi pa maaaring magpa-rehistro.

​

Marahil ayon sa Commision on Elections (COMELEC), nararapat na maging labing-walong (18) taong gulang bago o sa ika-9 ng Mayo, 2022.

​

Ang mga sumusunod ang ilan pa sa kwalipikasyon upang makapag-parehistro:

• Residente ng Pilipinas ng hindi bababa sa isang taon;

• Residente ng lugar kung saan ninanais bumoto ng hindi bababa sa anim na buwan bago ang ika-9 ng Mayo, 2022; at

• Hindi diskwalipikado ng batas.

​

Nananatili pa ring bukas ang COMELEC sa mga nagnanais pang magparehistro para makaboto hanggang sa ika-30 ng Setiyembre, 2021.